A política inquisitorial do alcalde de Santiago, Xosé Sánchez Bugallo, contra movementos sociais, organizacións e sindicatos que non lle son afíns, continúa. Por unha denuncia presentada polo alcalde, dous sindicalistas da Confederación Intersindical Galega (CIG), dos cais un é militante de Galiza Nova, enfréntanse cada un a 1 ano e 2 meses de prisión e o pago de máis de 3.000 euros de multa. As penas parecen corresponder a un delito moi grave, pero en realidade só pintaran na herba, con pintura plástica, o lema “CESPA EN FOLGA”, no contexto da folga que as xardiñeiras e os xardiñeiros de Compostela mantiñan no 2002 para mellorar as súas precarias condicións laborais. Curiosamente, para a limpeza só houbo que empregar auga, a pesar da peculiar "factura".

A CIG convocou unha concentración, da cal participará Galiza Nova, para o próximo martes 21, ás 13:00, nos composteláns xulgados de Fontiñas. Animamos a toda a mocidade galega a asistir e defender, máis una vez, a liberdade de expresión na capital do noso país.

A central sindical afirma no seu comunicado que “nos atrevemos a afirmar que o alcalde de Compostela se excede na súa denuncia, que resulta máis propia dunha broma. Maís dunha broma pesada, iso si.” No transcurso do conflito, o alcalde afirmara que non se quería inmiscuir a pesar de ser o Concello o propietario dos xardíns, pero en cambio ordeou que a empresa de limpeza do concello adecentara polas noites os xardíns, negando así o direito á folga dos traballadores e traballadoras de CESPA. E non só isto xa que dirixiu o acoso ás concentracións pacíficas que realizaban os traballadores mesmo cunha carga policial que rematou con tres persoas no hospital. Despois dun mes sen cobrar, cando a xustiza xa declarara ilegais os servizos mínimos decretados pola empresa, os traballadores deciden pintar en varios parques da cidade o lema “Cespa en folga” para dar a coñecer unha realidade que se pretendía ocultar.

Recentemente outro membro da CIG foi condeado a 6 días de prisión e multa económica por denunciar a actitude antisindical do concello no mesmo conflicto. Desde a CIG sinálase que “nos últimos anos vense impoñendo un modelo represivo que tende a xudicializar e criminalizar os conflictos sociais e laborais. Situacións que en calquer sociedade son asumidas con total normalidade, entendidas no marco do proprio conflicto, aquí están a xenerar o paso polos xulgados e a prisión de persoas involucradas no traballo sindical, de denuncia social, vecinal, xuvenil, etc.” Nos últimos días, falabamos dunha atitude agresiva e intimidatoria da Policía Nacional contra militantes de Galiza Nova, pero nos últimos meses temos o caso de Bernardo Paços Valdés, membro de Nunca Máis de Lugo enxuizado, dos tres sindicalistas de Lugo, dos veciños do compostelán bairro do Eixo, ou da Plataforma pola Defensa da Ría de Arousa.

Desde Galiza Nova acreditamos en que hai outro camiño máis normalizado para a resolución dos conflitos sociais, e seguimos a exixir o dereito á liberdade de expresión no Concello de Compostela. Tamén manifestamos a nosa plena solidariedade cos dous compañeiros submetidos a xuízo, e participaremos na concentración do martes 21.