A convocatoria da manifestación partira de ducias e ducias de colectivos sociais, organizacións ambientais, xentes do mar, organizacións políticas como o BNG e sindicais como a CIG e mais o propio Concello pontevedrés -gobernado polo nacionalista Miguel A. Fernández Lores-, que veñen reclamando desde hai anos a recuperación ambiental da ría de Pontevedra, co conseguinte traslado de Ence-Elnosa fóra da súa actual localización en terreos de Lourizán.

Como é sabido, tanto a dirección da empresa, como Caixa Galicia -máximo accionista de Ence-, como a propia Xunta de Galiza e o PP levan tempo negando sistematicamente a posibilidade do traslado de Ence a outra localización, menos prexudicial ambientalmente falando. Incluso, ameazan unha e outra vez co peche da factoría se finalmente expira o prazo dado para o seu traslado, no ano 2018, e non se forza o seu mantemento en Lourizán.

Até o momento, ademais, tanto Caixa Galicia como o Executivo galego estanse a negar a sentar nunha mesa de diálogo que dea solución ao conflito, cos menos custos sociais e laborais posíbeis. É máis, tanto o PP como a propia Caixa Galicia están levando a que se tensione máis o conflito a nivel social, servíndose para iso de sindicatos como CCOO e FIA-UGT, os cales, baixo a escusa da loita pola defensa dos postos de traballo, levan realizando unha intensa campaña en contra do traslado da factoría, campaña que posúe un claro trasfondo político, de desestabilización do goberno municipal de Pontevedra e de desgaste do equipo municipal encabezado por Miguel A. Fernández Lores, único alcalde nacionalista á fronte dunha das sete cidades galegas.

Tampouco non se debe esquecer o lamentábel papel dos medios de comunicación, tanto locais como nacionais, totalmente ao servizo da estratexia da Xunta de Galicia e da dirección da empresa.

Así e todo, a demostración do pasado sábado é unha mostra ben evidente da vontade dos cidadáns e cidadás de Pontevedra e a súa comarca, de rematar dunha vez coa situación provocada pola localización da factoría de Ence en terreos de Lourizán. Situación sobre a que parece existir unha importante sensibilidade en todo o país, sobre todo en sectores nacionalistas -o propio candidato do BNG á presidencia da Xunta, Anxo Quintana, participou da marcha-, que non deixaron pasar a oportunidade de amosar a súa solidariedade cos pontevedreses e pontevedresas na súa loita pola recuperación da ría.


Santiago de Compostela, 6 de xuño de 2005.