-Existe un novo modus operandi dos incendiarios, dirixido a causar o maior dano posíbel, alarma social, caos e desestabilización, provocando lumes a carón das cidades e das principais vías de comunicación. A isto súmanse as peores condicións meteorolóxicas posíbeis, de carácter excepcional: altas temperaturas, baixa humidade e fortes ventos.

-Estes dous elementos conxunturais súmanse ao gran problema estrutural do medio rural galego: o abandono das terras forestais e agrarias. Hoxe en día, o monte está pegado aos núcleos de poboación, o que aumenta o risco para a poboación.

-A consellaría de Medio Rural investiu 70 millóns de euros en medidas contra os incendios: os medios cos que conta Galiza son 4.700 persoas e 38 medios aéreos, entre outros, aos que hai que sumar a axuda de brigadas doutras comunidades. A maiores, aumenta a persecución policial contra os incendiarios. Porén, os incendios provócanse de noite, polo que avións e helicópteros non poden actuar. Ante unha crise tal, por moitos medios dos que se dispoña, sempre serán insuficientes.

-O Partido Popular ten responsabilidades na crise, tras 16 anos de goberno. En primeiro lugar, a súa política económica favoreceu o abandono da agricultura, co que as terras agrarias que rodean os núcleos de poboación quedaron a monte. En segundo lugar, a súa política contraincendios limitouse á extinción, sen tomar medidas de prevención nen investigar os causantes do lume. A maiores, 33 concellos gobernados por este partido rexeitaron os convenios ofrecidos para formar brigadas, polo que as críticas que fan son oportunistas e demagóxicas.

-A superficie que ardeu ata o día 4 de Agosto era a metade da queimada en 2004 no mesmo período. Porén, o goberno galego practica unha política de transparencia informativa e non manipula as cifras para ocultar a gravidade do problema, como fixeron os gobernos de Manuel Fraga.

-A consellaría de Medio Rural está a levar a cabo unha nova política que dará resultados a medio prazo. O principio a seguir é que os lumes se apagan en inverno -prevención fronte á extinción-. Así, estase fomentando a incorporación de mozos e mozas á actividade agraria e forestal, promóvense medidas lexislativas para obrigar aos propietarios a limpar o monte e estanse a facer repoboacións forestais con árbores frondosas -castiñeiros, por exemplo, máis difíciles de queimar- e non con eucaliptos. Detrás do terrorismo forestal pode estar a intención de impedir estes cambios impulsados polo conselleiro nacionalista Alfredo Suárez Canal.

Sen máis, recibe un saúdo nacionalista.
Gabinete de Comunicación do BNG