Para a CIG non cabe dúbida de que esta vaga de incendios non é casual e que, aínda á espera de que se identifique aos culpábeis, responde aos intereses de alguén que pretende sacar rendibilidade desta situación de terror.

Non pode ser casual que a inmensa maioría dos incendios se estean a producir nas zonas máis densamente poboadas do país a ao pé mesmo das vivendas provocando o pánico dos veciños. Non pode ser casual que a maioría dos incendios se estean a producir xusto en zonas de expansión urbanística e non pode ser casual que agora os incendios se estean a provocar tamén a carón das pistas dos aeroportos, nun claro intento de dificultar o tráfico aéreo, tanto das aeronaves para a loita contra incendios, como dos avións destinados ao tráfico de pasaxeiros e mercadorías.

A CIG manifesta a súa preocupación polas graves repercusións que terá para o país esta vaga, que cada vez semella máis claro que ademais está planificada, tanto polos custos medio ambientais a curto, medio e longo prazo, como polas inxentes perdas económicas derivadas.

A CIG agarda que se poña en marcha, unha vez remate esta situación de emerxencia nacional, un plano de recuperación medioambiental que posibilite rehabilitar o medio natural afectado e que poña fin, dunha vez por todas, ás políticas promovidas pola anterior administración. Políticas que favoreceron o abandono do medio rural, e que facilitaron, ao cabo, que esteamos padecendo a actual situación.

A CIG fai un chamamento á administración para que artelle un marco no que participen directamente todos os sectores implicados para que de forma conxunta se poña en marcha un plano integral de recuperación dos nosos montes, do noso agro e, en definitiva, do noso medio natural.