Sendo, unha vez máis, o pobo galego autoorganizado, ante o baleiro das institucións autonómicas e estatais, a principal ferramenta para a defensa da nosa nación.

Para ADIANTE esta cadea de incendios forestais non é casual nin accidental, senón que buscaba facer o maior dano posíbel, estando ligada a diversos intereses partidistas, urbanísticos e especuladores, así como a intereses madeireiros e de empresas eléctricas... E ten a súa orixe na crise estrutural do noso rural que comeza coa imposición por parte do Estado Imperialista Español na súa etapa franquista dunha política forestal baseada no roubo dos montes en man común para a súa transformación en extensas áreas de piñeiros e eucaliptos (para beneficio das empresas de enclave tipicamente coloniais).

A continuación desta crise é o progresivo desmantelamento do noso tecido agro-gandeiro coa conseguinte fuxida da poboación rural cara as cidades sen ningunha orde nin planificación, e ficando os nosos montes e aldeas abandonados á súa sorte, sendo a poboación rural a que mantiña vivos, coidados e limpos os nosos montes, debido ao seu aproveitamento.

Ante esta situación, nestes máis de 25 anos de autonomía, nunca existíu un goberno autonómico (nin estatal) que elaborara un verdadeiro proxecto do monte galego, do seu aproveitamento, coidado, protección e prevención contra o lume.

Desde ADIANTE exiximos ás institucións responsábeis a implementación de políticas estruturais (unha vez rematada a situación de emerxencia) destinadas a rematar co abandono do medio rural e coa súa desestruturación, estabelecendo planos de actuación destinados a potenciar o noso sector agro-gandeiro e forestal a través dunha Reforma Agraria baseada nos intereses nacionais e dos sectores populares.

Alén diso, é importante a implementación de politicas de prevención, subsidiarias das anteriores, como a limpeza de montes e a recuperación e replantación de especies forestais autóctonas.

Desde ADIANTE tamén queremos manifestar o noso apoio á manifestación nacional convocada pola plataforma Nunca Máis o vindeiro domingo 20 de agosto contra o terrorismo forestal e por un cambio nas políticas para o noso monte.

ESTAMOS FART@S DE SER UNHA COLONIA!