Corunha

As militantes de AGIR na Corunha expugérom, numha mesa ubicada na entrada da Faculdade de Direito desde terça-feira passada até esta mesma semana, numeroso material feminista editado pola nossa organizaçom ao longo dos mais de 7 anos de actividade antipatriarcal nas escolas e faculdades.

Junto com o posto instalado, um painel elaborado polas companheiras da comarca chamava a atençom sobre as diversas formas de opressom da mulher entre a mocidade, também a estudantil. Duas companheiras estivêrom as primeiras horas em que começou a actividade falando com as estudantes que se achegavam.

Com esta actividade num dos centros com mais populaçom estudante da UdC, a Assembleia Local tencionou fomentar o espírito crítico entre as estudantes, evitando cairmos na consideraçom exclussiva da violencia física como manifestaçom da violencia de género.

Compostela

A actividade antipatriarcal na USC constou da elaboraçom de diferente material.

Por umha banda, editou-se um colante com a legenda “Universidade, instituiçom patriarcal”, cuja legenda pretende reflectir sinteticamente o conteúdo do panfleto distribuido maciçamente entre os e as estudantes.

Neste panfleto AGIR achega a importáncia para a esquerda independentista da coeducaçom, conceito maioritariamente desconhecido entre o alunado, e as prácticas discriminatórias que, embora invissibilizadas pola sociedade patriarcal e a assunçom dos roles de género, fam efectiva a consolidaçom dumha escola na qual o capitalismo introduz o machismo como traço esencial da sua identidade.
No mesmo panfleto, as militantes de AGIR em Compostela exponhem a alternativa organizativa para a luita que AGIR representa, e quais as chaves do nosso combate feminista.

Além do mais, umha faixa foi pendurada no Auditório da USC, no Cámpus Sul, em 25 de Novembro, dia contra a violencia machista. Cumpre salientar o facto de a decana de História impedir que dita faixa fosse pendurada em História. Um precedente que teremos em conta.