Esta noite a SGAE celebra a 5ª Noite dos Autores. Este acto, presentación en sociedade antes da inauguración da súa sede no barrio de Vista Alegre, serve para premiar as entidades que están a funcionar como mecenas e embaixadores da súa chegada á nosa cidade. Estes socios, que deste xeito se posicionan contra a liberdade de difusión da cultura, son Inditex, o IGAEM (organismo público dependente da Xunta de Galiza), o Concello de Compostela, a USC e a Federación de Asociaciones Provinciales de Empresarios de Salas de Fiesta, Baile y Discotecas de España (FASYDE).

Ante esta indecente situación o Komando Anti-SGAE / Acción Cultura Libre comunica:

A defensa dos dereitos de autor/a implica en Compostela o gasto de 10 millóns en fondos públicos e a cesión por parte do concello e da USC da finca de Vista Alegre. Para tal obra,que cualifican como nova “Casa da Cultura”,empregáronse mil quilos de granito no que é cualificado coma “zona privilexiada” do eixo norte cidade, xunto cos futuros pisos de luxo, aos pés da casa do presidente, construído todo isto sobre as ruínas do edifício histórico do hospital, rodeado dunha zona verde completamente artificial.

Estamos a falar da sede da SGAE para o noroeste do Estado español, entidade privada que se lucra en nome da defensa dos dereitos dos/as artistas. Esta “defensa” materialízase a
través de métodos de lobby e coa plena submisión do goberno, con exemplos como a aprobación da “Lei de Propiedade Intelectual” (real decreto lexislativo 1/1996), que en ocasións é utilizada como excusa para expulsar a centos de persoas que teñen na venta de música na rúa o único xeito de supervivencia. Igualmente serve para anular o chamado
“dereito de liberdade de expresión” de dúcias de webs, radios e xornais libres creados por colectivos que pretendemos amosar a nosa perspectiva da realidade, afastada da que amosa a ditadura dos mass-media.

Ademais, nas súas actuacións albíscanse métodos empresariais como o canon imposto aos cd’s virxes e a moitos outros soportes, práctica da que sacan unha importante tallada e que dificulta a actividade e difusión das obras dos/as propios/as artistas.

É por isto que nos rebelamos contra a especulación e as súas mil caras, contra a que destrúe as nosas cidades, a que expulsa a persoas do territorio que habitan, a que
mercantiliza a nosa cultura e esmaga a nosa creatividade.

Contra esta situación creamos unha alternativa de autoorganización aberta e horizontal a través do Comando Anti-SGAE / Acción: cultura libre (antisgae.blogaliza.org) e
apostamos pola promoción da cultura libre e a libre difusión de saberes con todo tipo de rexistro libre.