Sancionadas as pessoas convocantes da manifestaçom autodeterminista do 6 de Dezembro

Galiza, 22 de Janeiro de 2008

A Subdelegaçom do Governo espanhol em Ponte Vedra sancionou com 600 euros a cada umha das três pessoas que convocárom em nome de Causa Galiza a manifestaçom que o passado 6 de Dezembro percorreu as ruas viguesas contra a Constituiçom espanhola e a favor da autoderminaçom nacional. As autoridades espanholas acusam os três companheiros de “nom manter a ordem na manifestaçom” e de “permitir” a queima dumha imagem do monarca espanhol.

Cumpre lembrar que a queima da efígie de Juan Carlos de Bourbon se produziu umha vez concluída a manifestaçom do 6 de Dezembro. A marcha, ademais, decorreu sem nenhum tipo de incidência.

Causa Galiza enquadra estas denúncias dentro da campanha incessante de criminalizaçom do movimento soberanista galego que empreenderom as autoridades espanholas. As sançons contra estas três pessoas suponhem umha clara conculcaçom dos direitos de reuniom e manifestaçom e pretendem amedrontar o conjunto da esquerda autodeterminista.

O acosso contra militantes da Causa Galiza nom é algo novidoso. Os dias prévios ao 25 de Julho agentes da polícia espanhola retiverom pôr volta de umha hora vários membros da entidade autodeterminista quando estavam a distribuírem cartazes e faixas da plataforma nas redondeças de Compostela, mesmo sancionando um deles ao qualificar a polícia de “arma” o pequeno utensílio que portava para furar e segurar as faixas. Esta situaçom repetiu-se o passado 6 de Dezembro quando umha dezena de números da Guardia Civil acossou quatro activistas da Causa Galiza ao rete-los e regista-los na AP-9 à altura de Caldas de Reis, no momento em que regressavam de Vigo após participarem na mobilizaçom organizada pola plataforma.

Por último, Causa Galiza quer exprimir a sua plena solidariedade e o seu total apoio os três companheiros sancionados pola Subdelegaçom do Governo espanhol em Ponte Vedra.