A manipulaçom e tergiversaçom dos feitos acaecidos na Faculdade de Económicas com motivo da presência de San Gil leva-me a lembrar aquel feito que, na altura, dera a volta ao mundo da desinformaçom e a manipulaçom.

Eram anos de luta contra a LRU (algo similar a LOU) e o activismo estudiantil estava no seu apogeo em todo o estado espanhol e especialmente em Compostela, onde os CAF (criados nom havia muito) levavam a voz cantante (na altura era umha organizaçom assemblear onde compartilhavam espaço correntes comunistas, nacionalistas, independentistas e mesmo anarquistas).

Umha dessas acçons levara-nos até o Reitorado com ánimo de fazer um protesto dentro do recinto universitário, mas ao chegar lá pecharom-nos as portas e pretendiam proibir a nossa entrada num recinto público e pagado e mantido entre toda a sociedade.

Ante isso houvo quem quigera pujar da porta antes de ser fechada e recebera um brutal ataque dum bedel armado com um parafuso. Aos poucos alguém tivera a "luminosa" ideia de queimar uns papeis e aos poucos saiu o mesmo bedel armado com um extintor de lumes disparando a escuma irritante contra a gente. Isso acendeu ainda mais os ànimos e aparecerom cartons e caixas para fazer mais lume. Todo fora moi rápido e quando nos percatamos do tamanho do lume quigemos apaga-lo, mas foi justo o momento escolhido pela polícia espanhola (vigiante todo o tempo desde Raxoi) para carregar violentamente contra todas nós e fazendo que o lume seguira vivo e afectara seriamente à porta do século nomseiquantos.

De seguido todos os falsimédias falarom de violentos e fanáticos e "semelha mentira que fossem estudantes".

Desses feitos participaram muitas pessoas (algumhas delas agora som candidatas ao congresso, alcaldes, concelheiras e até conselheiras do BNG).

Pena que a memória seja tam selectiva!!!