Candidaturas 2009?


As duas forças políticas independentistas galegas com possibilidades (?) de apresentar-se às eleiçons do passado 9-M optárom simultaneamente por chamar à abstençom do eleitorado independentista real e potencial. Umha sábia decisom por parte de ambas por três razons principais:

Primeira, iludem encenar umha realidade evidente: que, por desgraça, FPG e Primeira Linha nom estám em condiçons de capitalizar o independentismo realmente existente e o descontentamento que medra progressivamente, dentro e fora, à esquerda do BNG. Lográ-lo exigiria umha inserçom social e um reconhecimento que distam de desfrutar e arrogar-se fachendosamente tal papel encenaria, mais umha vez, presunçom vá para além de umha nudez e fraqueza difíceis de assumir.

Segunda, o generalizado descontentamento que existe neste povo nom é independentista na sua imensa maioria. O salto do rechaço e a crítica do existente que se estendem por toda a parte a umha posiçom independentista está ainda por dar-se e, nesse processo complexo, o ámbito eleitoral é o menos determinante. Conta o trabalho de formiga que fagamos no dia-a-dia. Portanto, botar as contas da leiteira que asseguram que enfado nacional igual a voto independentista, quando nom se figérom bem os deveres de participar nas luitas e conflitos, quando nom se é um elemento presente e influinte na maioria das dinámicas onde se defende e se joga o futuro do País, quando em demasiadas ocasions se joga à política espectáculo, é um exercício um tanto ridículo…

Terceira, ante a inexistência dessa opçom legitimada por toda ou por umha maioria significativa da base social independentista, chamar à abstençom e, paralelamente, priorizar a abordagem das questons mais primárias que afectam à construçom e consolidaçom do movimento, parece a saída mais lógica.

Os chamados simultáneos à abstençom vinhérom acompanhados nesta ocasiom de apelos também simultáneos à possibilidade de que, nas Autonómicas 2009, o independentismo galego concorresse com umha única candidatura ao processo eleitoral, e dotasse dumha expressom eleitoral ao rechaço da política institucional e do processo de destruiçom do território e degradaçom das condiçons de vida e de trabalho em que estamos, à vez que erguesse sem complexos a bandeira da soberania nacional. Som várias as reflexons que se nos ocorrem ao respeito:

1º Os problemas de articulaçom interna do movimento independentista galego, de superaçom da atomizaçom, a dispersom, a residualidade e as patologias seitárias, de decantaçom em forma de proposta sócio-política referencial e legitimada e de interacçom positiva com os movimento sociais, que som as questons que realmente devemos enfrontar e resolver, som muito complexos, tenhem um percurso próprio de resoluçom e devem resolver-se com paciência, criaçom de subjectividades construtivas e boa letra. Esse é o único caminho.

Os tempos prévios a períodos eleitorais nom som o momento mais adequado para este tipo de labores e muito menos para vender ao povo galego “unidades” e “acordos amplos” carentes de fundamento real, é dizer, cénicos, inconsistentes, fraudulentos, que implosionam o dia depois. A casa, como todo, começa-se polos cimentos e nom polo telhado: quem quiger que o independentismo poda concorrer a um processo eleitoral autonómico com umha candidatura própria, legítima, unitária e realmente representativa de si próprio, do movimento real, deverá começar pensar em como esse movimento disperso, atomizado e internamente conflitivo pode construir, no dia-a-dia, ámbitos amplos de reflexom, luita e intervençom sócio-política conjunta real que sejam sustentáveis e, sobretodo, vivíveis. É a partir dessa base material e subjectiva que se podem dar passos a outros níveis diferentes. Encenar mediaticamente aquelo de que se carece, vender fume, apresentar expectativas irreais… é umha prática mais própria de todos os que concorrérom a estas passadas eleiçons do que dum independentismo realmente revolucionário.

2º Alguns nacionalistas parecem entender, de forma subliminal, embora nunca o admitirám porque a sua verborreia revolucionária rechaça de raiz tal possibilidade, que a concorrência ao citado processo eleitoral 09 daria por si própria “peso”, “referencialidade”, “seriedade”, “releváncia”, “notoriedade”, “respeitabilidade”, etc. ao nosso hoje minoritário e fraccionado movimento. Errónea forma de pensar: o que nom se ganha no dia-a-dia do trabalho e da luita dificilmente se consegue em campanha eleitoral. Afortunadamente, o nosso povo é inteligente e daria as costas a experimentos como este. Compreender as cousas do modo que criticamos delata o grau de eleitoralismo real que existe sob determinados discursos “superrevolucionários”, como diria Fidel Castro. Conhecêmos nestes anos diversas experiências práticas disto que estamos a dizer e que som totalmente irrecomendáveis como modelos a emular.

3º A participaçom nesse hipotético processo de configuraçom dumha candidatura única independentista do entramado Primeira Linha, dividores destacados desta conceiçom espectacular e mediatizada da intervençom político-social, é um lastre seguro para o seu sucesso. Evitaremos dar mais explicaçons que devem ser evidentes para qualquer militante que conheça a natureza desta fracçom e seguisse o evoluir do movimento nos últimos 15 anos. A unidade, qualquer umha, for do tipo que for, é impossível de construir com quem olha para os seus aliados com pulsons canívais e com quem demonstra ser incapaz de construir convivências políticas e organizativas produtivas e respiráveis.

4º Seria positivo que o Movimento Nacional-Popular Galego ou o Movimento de Libertaçom Nacional Galego fosse capaz de concorrer às Autonómicas 2009 com umha candidatura independentista representativa do movimento real, isto é, que fosse muito para além dum acordo superestrutural entre organizaçons políticas incapazes de integrar dentro de si esse movimento; que relegasse, a sério, protagonismos seitários e personalistas; que incorporasse os agentes sociais e as pessoas que em dezenas de pontos da Galiza estám a trabalhar na construçom nacional deste País e se enfrontam de facto ao capitalismo colonial com independência de serem cientes ou nom desta realidade; que mobilizasse esse activo de rebeldia e ilusom que existe no fundo do povo e só se ergue em situaçons de emergência; que exprimisse ao mais combativo deste País... Contodo: acho que tal processo careceria de qualquer razom de ser se fosse um fim em si próprio, se nom estivesse inserido num processo mais amplo de superaçom do presente do independentismo, se nom se concebesse como mais umha achega a umha dinámica aberta de articulaçom dum MLNG digno de tal nome. Quando estas condiçons nom se cumprissem, a apresentaçom dessa candidatura que se sugire suporia com segurança vender fume e tratar de fazer em AVE um percorrido sinuoso, nada rectilíneo, que, se se pretende andar a sério, unicamente pode ser andado amodo, com ritmos próprios, construindo a imprescindível confiança e com boa letra. As eleiçons de 2009 nom som a meta, mas mais um instrumento para um processo muito mais amplo, profundo e importante que algum dia deveremos focar…

É o momento, pois, de avançar.

Na Terra, em 12 de Março de 2008