Fam os parêntesis no seu fundamentalismo capitalista quando os seus próprios intereses estám em jogo. O santíssimo regulador espontáneo, esse ente chamado Mercado, quando nom atura mais as suas descabeladas iniciativas especulativas, é baixado do altar para que intervenha o Estado, que nos tempos de vacas gordas é, na sua terminologia neo-liberal, o inimigo da Liberdade. Esta semana de setembro tem sido o mais arrepiante akelarre do selvagismo capitalista, a autêntica semana negra contra as pobres da terra. Rebaixo a demagogia: Contra todas as clases médias do universo, as que pagam impostos, as que aforram, as que vivem das rendas dol trabalho e nom das da especulaçom ou o património.

Estamos a viver a Grande Troula do Capitalismo, a mostra mais incontestável de que as palavras como Democracia, Igualdade, Justiça, nom som nada mais que enteléquias manuseadas pelos mandamases deste mundo injusto. O feito de que em quatro días se passem de criar o pánico na povoaçom, a umha farra malgastadora, nom é nada mais que a confirmaçom de que rim de nos, na cara, que nom é retórica nem dogmatismo assegurar que agora manda o Capital, as Finanças, os deuses do Dinheiro, a través dos seus corpos de ejército que se chamam Bancos, Asseguradoras, Bolsas, Impostos e ministérios de Fazenda. Na reserva estám os médios de comunicaçom, com as televisons na infanteria da desinformaçom e a sua vontade inequívoca de ponher o foco e os objectivos naquilo que lhes interesa para desmovilizar ou colocar à povoaçom nuns paraísos artificiais tam aditivos como as drogas.

A mensagem é nítida: se es um pobre trabalhador metido numha hipoteca, vas ter que buscar-te a vida e foderte. A nos, os que já ganhamos todo o que te roubamos, por se acaso, os bancos centrais vam-nos injectar uns quantos miles de milhons de euros e dólares para que segamos dominando o mundo. Os teus impostos nom vam à Sanidade ou ao ensino público, nem às pensions, senom à especulaçom financieira. Por isso celebramo-lo com umha grande troula. Ficamos com cara de idiotas.