Bagaria está acusada pola colocaçom de três aparelhos incendiários na maquinaria que trabalhava nas obras de construçom dumha minicentral hidroeléctrica no rio Arnoia ao seu passo por Rubilhós (A Merca).

A Fiscalia espanhola qualifica os factos como um “delito de danos com carácter terrorista” e solicita para a militante independentista umha condena de três anos de prisom, a inabilitaçom absoluta por um período de 9 anos e umha ‘indenizaçom’ à empresa construtora que se aproxima dos 2500 euros. O tribunal especial datou o juízo exactamente o dia depois de rematar o processo contra Ugio Caamaho e Giana Gomes.

Oposiçom à minicentral

Maria Bagaria já fora detida em Novembro de 2005 no marco da chamada ‘Operación Castiñeiras’ iniciada contra a Assembleia da Mocidade Independentista. Recordamos que esta operaçom mediático-policial e o sumário a que deu lugar no seu dia fôrom finalmente arquivados por decisom do juíz responsável pola causa. As acçons de sabotagem das que a Justiça espanhola responsabiliza agora à independentista galega datam de Outubro de 2004 e enquadram-se no marco da oposiçom vizinhal iniciada na Merca contra as obras da infraestrutura hidroeléctrica.

O processo de que agora é objecto Maria Bagaria estivo primeiramente destinado a um julgado ordinário em Cela Nova, mas, finalmente, foi transferido para a ‘Audiencia Nacional’, umha vez que as sabotagens fôrom tipificadas como “terroristas”. A militante galega participa actualmente no movimento juvenil independentista e no movimento feminista galego.


Mais informaçom:  http://www.ceivar.org