O 8 de março é um dia de luita desde que em 1910 se assinalou como um dia de mobilizaçom polos direitos das mulheres. Durante estes quase cem anos de concentraçons, manifestaçons e actos por todo o país sempre se tentou/ tentárom que a nossa luita fosse utilizada polos partidos políticos, polos sindicatos, redes dirigidas por conselharias.

O 8 de março na actualidade tenta também ser utilizado, negando-lhe de seu a independência que o movimento feminista, como qualquer outro movimento social, tem que ter, e assi vemos como os actos do 8 de março som organizados e financiados por concelhos, deputaçons, secretarias gerais deixando de lado as verdadeiras protagonistas deste dia: as mulheres, tentando silenciar-nos e dirigir-nos por estas administraçons e organizaçons moderadas com uns fins claros: lograr o voto feminino, impedir a auto-organizaçom das mulheres, o seu empoderamento, figurar nos meios de des-comunicaçom como administraçons ou organizaçons que som “feministas”, demonstrar que a sua “paridade” é ideologica… esta nom é mais que outra demonstraçom do sistema patriarcal no que nos movemos, que ante todo o que pretende é controlar as mulheres na sua totalidade. Estamos já fartas, deste sistema de opressom que nos despreza e pretende dirigir-nos até na nossa luita.

Queremos manifestar que a luita feminista é umha luita na que só decidem as mulheres, que apoiaremos a todos os grupos feministas de base, sem siglas de partidos políticos, que luitam diariamente para que a destruiçom do patriarcado seja um objectivo real, visibilizando as agressoms machistas deste sistema capitalista nas ruas mas començando com a mudança nas casas e na vida diária, que vamos respostar ante qualquer agressom machista de umha maneira clara e contundente e nom vamos ficar caladas nem um segundo mais. Nom queremos nem podemos esquecer tampouco a necessária luita e visibilizaçom das mulheres lésbicas, bisexuais e transexuais, porque como puidemos comprovar coa sentença homofóbica do júri popular de vigo de há só umhas semanas, temos muito caminho por percorrer para que os preconceitos e a homofobia deixem de ser barreiras que temos que choutar e contra as que luitar no nosso dia a dia. Por isso, hoje mais que nunca, demandamos un feminismo activo, diverso e visível, que nom se deixe instrumentalizar, que nom se venda, e do que participemos mulheres novas e também doutras geraçons, mao a mao, pois elas abrírom o caminho mas ainda fica muito por sachar.

VIVA O 8 DE MARÇO!

QUE VIVA A LUITA DAS MULHERES!

ASSEMBLEIA DE MULHERES DE VIGO