O projecto nasce como resposta ao ensino tradicional, ao serviço de interesses alheios que favorecérom o desmantelamento e abandono do ensino público. Nesta linha, os integrantes do projecto afirmam que a EPG «quer ser um instrumento à disposiçom da comunidade nacional galega para exercermos a soberania educativa a partir de um ensino solidário e crítico».

A este respeito, a EPG estabelece três linhas de trabalho:

Estudo da nossa realidade histórica, social, económica, ambiental e adquisiçom de competência linguística.

Formaçom prática em conhecimentos e saberes adquiridos por transmisom social e/ou geracional que ficam à margem do sistema educativo regrado.

Criaçom de serviços que respondam às necessidades sociais: integraçom linguística dos imigrantes, alfabetizaçom de adultos, criaçom de espaços e compilaçom de recursos para a educaçom das crianças em galego, em valores anti-capitalistas, nom patriarcais, comunitários e ambientalistas.



Como projecto aberto, a EPG acolhe a participaçom de toda pessoa que tiver interesse, oferecendo a possibilidade de colaborar como docente, promotor e ou dinamizador, aluno, auxiliar ou associando-se ao projecto e contribuindo economicamente para a sua viabilidade.

A EPG conta cumha Sede Nacional em Vigo no coraçom da cidade velha (Rua Real, 12), ocupando o obradoiro em que se imprimiu Cantares Gallegos em 1863. Esta Sede dispom dum espaço de 150 m2 em que se oferecerám os serviços de biblioteca popular, videoteca, arquivo dos movimentos políticos e sociais galegos, hemeroteca, sala de internet etc. Ainda, a sede alberga também o «Espaço para a criança Folhas Novas» autogerido pola Associaçom galega de maes e pais Agarimar.

Para além do já referido, a nova associaçom conta também com um blogue no serviço de hospedagem da Associaçom Galega da Língua (Blogues AGAL-gz) desde o que informam a respeito das actividades, obradoiros, seminários e cursos ofertados.