Mais de 9000 pessoas saiam onte às ruas de Vigo para exigir a paralisaçom do novo Plano Geral de Ordenaçom Municipal (PGOM) pactado polo PP e o BNG. A convocatória partia dumha Praça do Concelho ateigada de gente, sem o respaldo de nengum dos grupos políticos com representaçom municipal e organizada por arredor dumha trintena de colectivos e associaçons dos bairros e paróquias da cidade.

Previamente a esta grande manifestaçom vicinal, a semana iniciava-se com a entrega de 38.000 alegaçons ao projecto urbanístico no registo municipal. A mobilizaçom discorreu entre palavras-de-ordem contra os responsáveis políticos do PGOM José María Figueroa -actual concelheiro de Urbanismo (PP)-, o dirigente do BNG Xavier Toba –anterior edil desta carteira no governo BNG-PSOE, considerado pai intelectual do projecto- e o governo municipal de Corina Porro. Aliás, coreárom-se palavras-de-ordem como Vigo nom se vende, Nom ao Plano Geral, Maos arriba: isto é um atraco ou Plano geral, plano do capital.

A mobilizaçom discorreu sem incidentes resenháveis até a Escola de Artes e Ofícios, instalaçom que estes dias acolhe a exposiçom pública do PGOM. Ali dou-se leitura ao manifesto unitário em que se fizo umha crítica do documento “por estar feito de costas ao povo, nom ser participativo e nom ser democrático”. Umha multidom de colectivos e associaçons populares exprimiam o seu apoio à convocatória, pondo de manifesto o amplo rechaço social que o pacto entre o PP e o BNG tem desatado entre a cidadania viguesa. Citar como mais salientáveis a Coordenadora pola supressom da Ronda de Vigo, a Comissom de afectados pola depuradora de Corujo, a Associaçom de afectad@s polo Plano Especial de Protecçom do Monte da Guia e umha dúzia de comissons de vizinhos atingidos por diferentes Peris (Sárdoma, Samil-Návia, Guixar, Torre Cedeira, Carvalha, Tomás Alonso, Raviso, etc.).

Citar também entre as entidades que apoiárom a convocatória o Plano Comunitário de Teis, Vozes do Litoral, Asivigo, Associaçom Vicinal de Lavadores e A Salgueira, Associaçom Cultural Revolta, Agir, Grupo de Agitaçom Social, NÓS-Unidade Popular e IU-EU. Os ánimos estám bastante tensionados arredor do planeamento e as entidades assegurárom que a manifestaçom de onte era mais um chanço dumha luita que deve continuar.

Um PGOM para as promotoras e construtoras

O projecto que avalam PP e BNG suporia a entrega absoluta do urbanismo na cidade viguesa a grupos económicos privados. Assinalaremos, além de outras informaçons que galizalivre.org veu publicando estes dias sobre o PGOM viguês, que o texto urbanístico projecta construir 123.000 novas vivendas nos 109 quilómetros quadrados do termo municipal. Dizer, aliás, para podermos albiscar as dimensons da operaçom, que o número de vivendas existente na cidade actualmente é de 113.000 e 28.000 destes andares estám desocupados.

Este colosal negócio do solo e a construçom desenvolveria-se a razom da edificaçom de 2000 novas vivendas anuais, requalificando 500 âmbitos do termo municipal e urbanizando 70% do rural, incorporado definitivamente a umha macrourbe que disporia de 40 zonas de torres entre as 12 e as 20 alturas. Somemos a isto a construçom da Ronda de Vigo, projectada para “comunicar as paróquias com o centro da cidade” -embora os destinatários reais do modelo sejam Citröen e Carrefour e muitas paróquias nem sequer disponham de acessos à citada via- e teremos um quadro aproximado do que está a ocorrer.

Surge um movimento vicinal nom burocratizado

Se algo resulta destacável no novo movimento vicinal que pode calhar na cidade de Vigo, além do seu carácter maciço, a sua escassa organizaçom e a articulaçom por volta dos efeitos do PGOM em cada bairro e paróquia, é a sua absoluta desvinculaçom dos grupos políticos municipais, umha extendida desconfiança face o chanchulho institucional e a desconexom a respeito da chamada Federaçom de Associaçons de Vizinh@s de Vigo, entidade supeditada a distintos partidos institucionais, que vem agindo como dique de contençom das protestas nos bairros e paróquias e lançava esta semana acusaçons contra as entidades e pessoas mobilizadas onte. O entreguismo da Federaçom era ultrapassado nos factos pola própria cidadania afectada. Incluso algumhas associaçons desligavam-se da postura oficial para assistir à protesta.

Assinalar a respeito da participaçom de organizaçons políticas, a presença exclusiva de IU-EU e NÓS-Unidade Popular. A formaçom independentista vem pondo acima da mesa a estreita vinculaçom entre o capital financeiro, industrial e comercial e a planificaçom desenhada por PP e BNG. NÓS-UP denuncia, aliás, a agressom que o PGOM suporá ao riquíssimo património histórico, cultural e natural viguês, assim como os efeitos da turistificaçom no termo municipal (urbanizaçons de luxo e portos desportivos sobre áreas litorais). Onte, @s independentistas participárom num extenso cortejo com umha faixa onde se podia ler a legenda Defendamos a Terra: por um PGOM racional e sustentável ao serviço do povo trabalhador.

Resenhar, por último, que nos dias prévios à manifestaçom activistas de associaçons vicinais, comissons de afectados e da própria formaçom independentista galega NÓS-UP fôrom objecto em diversas ocasions de acossa e perseguiçom por parte de agentes municipais. A Polícia local vem-se escudando na ordenança ditada por Corina Porro que sanciona qualquer actividade propagandística realizada à margem da mídia oficial. A nova normativa impunha-se recentemente com vistas à celebraçom da regata de elite Volvo Ocean Rice o vindouro mês de Novembro e para a que as autoridades locais querem ter a cidade “limpa”.